(1)

Le Rialachán (AE) Uimh. 524/2013 ó Pharlaimint na hEorpa agus ón gComhairle (3), bunaíodh an Clár Eorpach um Réiteach Díospóidí ar Líne (‘an Clár ODR’), agus tugadh sainordú don Choimisiún é a fhorbairt agus a choimeád ar bun, ar leibhéal an Aontais, lena gcuirtear aon phointe amháin iontrála ar fáil do thomhaltóirí agus do thrádálaithe atá ag iarraidh réiteach lasmuigh den chúirt ar dhíospóirí a eascraíonn as conarthaí díolacháin nó conarthaí seirbhíse ar líne.

(2)

Is éard atá sa chlár ODR suíomh gréasáin idirghníomhach ar ar féidir le tomhaltóirí iarraidh ar thrádálaithe teacht ar chomhaontú maidir le heintiteas um réiteach malartach díospóidí (ADR) a úsáid, ar eintiteas é atá liostaithe ar an gClár ODR, agus lena gcomhlíontar Treoir 2013/11/AE ó Pharlaimint na hEorpa agus ón gComhairle (4).

(3)

Le Rialachán (AE) Uimh. 524/2013, ceanglaítear ar thrádálaithe ar líne agus ar ionaid mhargaidh ar líne nasc chuig an gclár ODR atá inrochtana go héasca a chur ar fáil ar a suíomh gréasáin. Thug an oibleagáid sin, mar aon le feachtais faisnéise ar eagraigh an Coimisiún agus páirtithe leasmhara náisiúnta, idir dhá mhilliún agus trí mhilliún cuairteoir chuig an gclár ODR gach bliain.

(4)

Mar sin féin, ní úsáideann ach mionlach cuairteoirí an clár ODR chun gearán a chur isteach agus ní fhaigheann ach 2 % de na gearáin sin freagra dearfach ó thrádálaithe, rud a chiallaíonn gur féidir a n-iarratas a tharchur chuig eintiteas ADR atá liostaithe ar an gclár ODR. Ar an iomlán, is ionann sin agus thart ar 200 cás in aghaidh na bliana ar fud an Aontais.

(5)

D’fhoilsigh an Coimisiún glao ar fhianaise maidir le réiteach díospóidí lasmuigh den chúirt a chur in oiriúint do mhargaí digiteacha, glao a bhí ar siúl ón 28 Meán Fómhair go dtí an 21 Nollaig 2022. Tháinig an Coimisiún ar an gconclúid nár bhain ach 5 % de thomhaltóirí a d’fhreagair an glao ar fhianaise sin úsáid as an gclár ODR, agus mheas tromlach na bhfreagróirí gur cheart feabhas suntasach a chur ar an gclár ODR nó deireadh a chur leis toisc nach raibh sé costéifeachtach. Ós rud é nach n-aistrítear níos mó ná 200 cás in aghaidh na bliana chuig eintiteas ADR, tugtar le fios go láidir leis an bhfianaise nach gcomhfhreagraíonn coinneáil an Chláir ODR ar bun a thuilleadh do phrionsabail na héifeachtúlachta agus na héifeachtachta dá bhforáiltear i Rialachán (AE, Euratom) 2024/2509 ó Pharlaimint na hEorpa agus ón gComhairle (5).

(6)

Ba cheart deireadh a chur leis an gclár ODR agus ba cheart, dá bhrí sin, Rialachán (AE) Uimh. 524/2013 a aisghairm. Ba cheart am iomchuí a chur ar fáil chun a áirithiú gur féidir cásanna atá ar siúl faoi láthair a chur i gcrích go leormhaith.

(7)

De bhun Rialachán (AE) Uimh. 524/2013, coinnítear sonraí pearsanta a bhaineann le díospóid sa bhunachar sonraí arna bhunú de bhun an Rialacháin sin ar feadh na tréimhse ama is gá chun na cuspóirí dar tiomsaíodh na sonraí sin a ghnóthú agus chun a áirithiú gur féidir leis na hábhair sonraí rochtain a fháil ar a gcuid sonraí pearsanta d’fhonn a gcearta a fheidhmiú. I gcomhréir le Rialachán (AE) Uimh. 524/2013, tá na sonraí sin le scriosadh go huathoibríoch 6 mhí ar a dhéanaí tar éis an dáta a dtabharfar chun críche an díospóid a cuireadh ar aghaidh chuig an gclár ODR. Ba cheart don Choimisiún úsáideoirí an chláir ODR ag a bhfuil cásanna leanúnacha a chur ar an eolas faoi dheireadh a bheith á chur leis an gclár ODR in am trátha, agus in aon chás ar a laghad 4 mhí sula gcuirfear deireadh leis an gclár sin. Ba cheart don Choimisiún cúnamh a thairiscint d’úsáideoirí an chláir ODR ar mian leo sonraí a bhaineann lena ndíospóidí a aisghabháil.

(8)

Ós rud é go dtagraítear i ngníomhartha dlí eile de chuid an Aontais don chlár ODR mar chlár lena gcuirtear ar a gcumas do thomhaltóirí iarraidh ar thrádálaithe teacht ar chomhaontú maidir le réiteach díospóide lasmuigh den chúirt, ba cheart na gníomhartha sin a leasú chun tagairtí don chlár ODR a bhaint. Dá bhrí sin, ba cheart Rialacháin (AE) 2017/2394 (6) agus (AE) 2018/1724 (7) ó Pharlaimint na hEorpa agus ón gComhairle a leasú dá réir sin. Tá tagairtí do Rialachán (AE) Uimh. 524/2013 i dTreoracha (AE) 2015/2302 (8), (AE) 2019/2161 (9) agus (AE) 2020/1828 (10) ó Pharlaimint na hEorpa agus ón gComhairle freisin.. Tá sé beartaithe na Treoracha sin a leasú le gníomh dlí ar leith,